記：今季唔單止華籍練馬師成績好，連華將表現都相當不俗，剛剛黃皓楠同巫顯東都有馬贏，證明只要有好座騎一樣交到貨。

賴：跑馬始終以馬為先，再配合形勢就會有好成績。

今晚（22日）梁家俊手上不乏實力座騎，其中佢騎開第五場四班1000米的「鼓浪威風」相信可以補中。

呢匹馬體型非常龐大，達1,200磅以上，前仗五班賽排內檔，無擠無阻，贏得相當輕鬆，而跑第二的「幸運飛駒」再出亦補中，賽事水準甚高。

上仗升到第四班，又再跟守貼欄好位，可惜途中被旁邊馬匹碰撞，大馬困守內欄位置窒步影響走勢，入正直路修正撲上，可惜為時已晚只得季軍。

今次再跑1000米，對手實力比上仗差一截，「鼓浪威風」天生快閘，跟守前列唔難。

加上A欄轉彎馬群唔散，大馬今次排8檔走出點可能仲好，姚本輝的馬好開續好，今場勝望依然高。

記：莫雷拉今晚騎足九場，實力馬固然唔少，有邊匹值得特別推介？

賴：我比較喜歡第六場四班1650米的「多多」，呢匹蔡約翰的馬上季出賽次數甚多，不過一直贏唔到，掛住蔡廐招牌未免失望少少。

不過其實當時馬匹仍是三歲，踏入今季明顯進步，前仗擊敗「偉大勝利」開齋。

雖然勝出，但原本跟好位的「多多」轉彎時其實唔暢順，一度減速，及後被巴度力騎險勝。

上仗留後飛出大外叠，姍姍來遲得第三，今次換上好韁繩的莫雷拉，可以補中。