胡杏兒今日以乳癌關愛大使身份，著上deepV晚裝喺尖沙嘴出席微電影首映禮，提醒女士要年年驗身。

超性感嘅杏兒直言成為關愛大使之後，對乳癌認識加深咗，佢話：「成日有keep住驗身，而且做呢行瞓覺時間亂，更加要定期檢查。」

杏兒講到四、五年前一個經歷，令佢更愛惜自己身體： 「嗰時試過隻眼睇嘢無端端好朦，走去搵醫生check，當瞓喺床嗰一刻真係好驚，好在醫生檢查完話病係因為偏頭痛壓住神經引起。」

講到唔少大使都會拍攝大膽海報宣揚每年驗身重要性，杏兒笑言自己冇本錢，但依然樂於參與。