韓國男團Super Junior今日將會襲台灣，周末將會喺台北小巨蛋舉行「Super Show 7」演唱會，利特、希澈、藝聲、神童、東海及始源則今日從韓國出發去台灣，而銀赫將會喺日本飛去台灣會合隊友。

而今日SJ所屬嘅SM事務所就發聲明，指成員希澈因為健康問題，將無法參加新專輯《REPLAY》嘅音樂節目宣傳，SM方面指希澈只係唔現身音樂節目嘅舞台演出，其他宣傳活動則會如常。同時表示SJ主打歌《Lo Siento》預計將由利特、藝聲、神童、銀赫、東海及始源六名成員參加。

事實上希澈已經唔係第一次缺席SJ活動，去年希澈曾經喺Instagram透露因早年嘅車禍導致腳受傷，由於腳踝越來越痛，令佢未必能夠參與SJ活動，當時唔少粉絲都質疑SM冇體諒希澈嘅情況，唔知係唔係咁今次SM先主動發稿，等希澈唔使參與舞台演出，好好休養。

更多韓流，喺晒《娛果》
http://fb.com/appledailyent