田北俊昨撐唐批屋宇署，指署方調查唐英年的僭建近一年，「效率唔慌高得去邊」，又指新界原居民大可放心，不怕政府會清拆村屋僭建：「如果屋宇署咁嘅效率，新界侯志強佢哋咪冇有怕？你咁查一百年都查唔晒啦！」
對於署方遲遲不批准唐英年的還原僭建方案，田感到奇怪：「地下有乜？咪泥同石囉，你叫我還原咪就係隊番啲泥同石落去，有乜咁難啫？我又唔係叫你裝修，整中央冷氣、整電線。」
另一立會議員林大輝亦表示，理解唐英年被署方調查多時致「一路冇屋企返」，因而心生怨氣，不過他反對唐英年入紙封牆，因為這不代表僭建不存在，「我唔相信市民或者專業人士會接受，如果咁樣使乜用磚？用塊布冚住佢得啦」，又認為唐的做法只是為難屋宇署。
身兼行政會議成員的新民黨葉劉淑儀亦反對唐的做法，直指「唔能夠用牆遮住就當冇事」，又稱唐、梁的僭建嚴重性不同，不覺屋宇署做法有問題。工黨張國柱則贊成唐英年做法，認為這正好「還屋宇署一個公道」，藉此證明自建磚牆密封僭建物是否正確做法，希望署方盡快作交代。
《蘋果》記者