【爆相爆片】中秋Plan定聖誕假 Chilam夫婦為魔童報讀滑雪學校

蘋果日報 2018/09/22 00:00

Chilam靚靚袁詠儀滑雪張智霖魔童
    張智霖（Chilam）同袁詠儀（靚靚）早排趁住暑假，帶11歲囝囝魔童去咗英國旅行，一家三口最近又去咗東非國家肯亞，手拖手喺草原睇日落！（新聞連結： http://bit.ly/2xr2IX4 ）
    咁鍾意去旅行，嚟緊最近嘅學校長假期已經要數到聖誕節，相信Chilam一家三口已經安排好到時去滑雪。事緣本報讀者馮先生日前透過「爆相爆片」，影到Chilam夫婦帶住魔童去北角一間滑雪訓練中心報讀課程。而該中心有一座模擬滑雪機，可以畀學員喺室內學滑雪。
    馮先生話喺天后電氣道見到Chilam一家三口，佢話：「嗰日下晝6點幾喺一幢商業大廈一樓見到Chilam企咗一喺一間滑雪學校門口玩電話，而阿靚同囝囝就係學校入面，相信佢哋係報讀課程。」馮先生話冇耐靚靚就拖住魔童出嚟，Chilam一馬當先離開。阿靚全程喺老公後面絮絮不休同囝囝講話，魔童木無表情喺度聽。去到搭扶手電梯時，靚靚講到慶起，仲手舞足蹈。當電梯落到地面時，靚靚忽然如夢初醒大叫「唉吔！漏咗把遮喺上面。」一講完就掉低兩父子轉身上樓，而兩父子好似見怪不怪咁繼續步出大廈。
    當阿靚9秒9攞番把遮落樓之後，已經唔見咗兩父子，阿靚先探頭外望向右邊行去，行咗兩步發覺唔對路，即刻調頭去番左邊。果然阿靚嘅司機就停喺不遠處，而兩父子亦已經印印腳坐定定喺車度等。
    精選娛聞，喺晒《娛果》
    http://fb.com/appledailyent
    empty
    Chilam同袁詠儀一齊陪囝囝報讀滑雪課程。（讀者馮先生提供圖片/ig圖片）
    empty
    Chilam喺電梯口等埋兩母子。（讀者馮先生提供圖片）
    empty
    兩父子木無表情聽阿靚講話。（讀者馮先生提供圖片）
    empty
    阿靚似乎一直冇停過表達意見。（讀者馮先生提供圖片）
    empty
    攞完遮阿靚急步離開，兩父子已經唔見咗。（讀者馮先生提供圖片）
    empty
    望望右、望望左，阿靚都搵唔到架七人車。（讀者馮先生提供圖片）
    empty
    Chilam兩父子已一早上車等阿靚。（讀者馮先生提供圖片）
    empty
    童魔向來好動，最鍾意玩滑板，身手都唔錯。(ig截圖)