張敬軒、許廷鏗、鍾舒漫今日到海洋公園出席宣傳活動，軒仔為活動打頭陣表演，噚晚佢同容祖兒喺亞博做騷，軒仔話：「喺台上被祖兒一棟過一棟，又話同我金蘭姊妹，真係一額汗，唔知佢會掟啲乜嘢出嚟。」軒仔首次同祖兒合作，之後會認真考慮一齊做騷。

點解以金蘭姊妹形容大家？軒仔話因為佢同祖兒太熟，不過當時自己毫無還擊之力，又唔想喺工作場合講私人嘅嘢。又話同祖兒合作獲益良多，贊對方好瀟灑，好有天后風範，軒仔笑稱：「我都一樣係天后，不過下一站天后進發，明年計劃紅館開騷。」祖兒今年不會出席樂壇頒獎禮，軒仔暫時未知公司安排，如果喺香港都會出席支持，睇好李克勤同陳柏宇。

早前好朋友關智斌去日本蒲同志吧被直擊（新聞連結： http://bit.ly/2zP7P5B ），軒仔笑言：「酒吧咋係嘛，我哋冇就呢件事聯絡，咁大個人自己有分數啦，佢中文都未識得晒，日文都唔識分，好多藝人又或女藝人都會去呢類型酒吧玩，我唔覺得有敏感，可能對傳媒有新聞價值，有時我哋去到外地朋友都帶咗我地去架步都唔知，識過有次去花都有廣州地膽朋友帶我哋唱卡拉OK，點知上到去有小姐坐檯，我哋立刻走。」

許廷鏗雖然唔係南區長大，但有好朋友住南區，回想以前讀書階段佢話自己好唔起眼，直至入行先俾人話靚仔。近人許廷鏗被King Jer稱為將軍澳吳尊，佢話：「好多謝咁樣幫我宣傳唱片，大賣都靠佢，除緋聞之外都好多人幫佢post宣傳新碟好開心。」今年係許廷鏗第一年唔使做台慶，佢話會返家休息下，佢指近日新碟銷量好同埋新歌攞冠軍，覺得呢排好事近，被取笑佢要搵胡鴻鈞沖喜一下，許廷鏗話：「辟邪就有。」

更多娛聞，喺晒《娛果》
http://fb.com/appledailyent