中國官方多次要求將武漢肺炎稱為「新型冠狀病毒肺炎」，總之就唔可以同中國或者武漢扯上關係，但中資背景嘅星光文化娛樂（1159）晚上話，將聯合開發製作並且海外發行劇情紀錄片《武漢！武漢！》，講明部片將以多個普通人嘅經歷「展現全民抗擊疫情」嘅故事，並邀請國內外知名電影人及影星加盟，確保高水平製作，預計今年6至7月份上映。

公司仲形容，齣片係一部「吸引全球熱點且具有重大意義的感人佳作」，「極具衝刺奧斯卡獎項的潛力」，通告冇提及電影拍攝地點，但從字裏行間同電影名，應該都係紀錄武漢同內地嘅抗疫情況，但就想得到美國人設立嘅奧斯卡金像獎嘅認同。

《武漢！武漢！》呢個戲名同2009年上映嘅《南京！南京！》格式甚為相似，都係地名加感嘆號。《南京！南京！》係一部以南京大屠殺為題材嘅電影，事件發生地點喺南京。以同一邏輯，星光文化直接用「武漢」做片名去講「肺炎」，即係變相正名做「武漢肺炎」，唔驚中共嬲嬲豬咩？

通告冇講套紀錄片其他製作方係邊個，但中共中宣部、國務院新聞辦早前已出書，指導出版《大國戰「疫」——2020中國阻擊新冠肺炎疫情進行中》，全書歌頌中共總書記習近平，彰顯「中共領導的中國特色社會主義制度顯著優勢」。唔知《武漢！武漢！》嘅主旋律是否都係同出一徹。

李華華