韓國「國民妹妹」IU今年迎來出道10周年，日前推出特別新歌《BBIBBI》回歸樂壇，更獲韓版《步步驚心》拍檔李準基義氣力撐，合體現身JTBC人氣綜藝節目《認識的哥哥》，節目噚晚公開IU、李準基任嘉賓一集嘅預告，透露相關節目於20號晚上播出。

IU與李準基都身穿校服亮相，李準基又披上黑色袍，重演《步步驚心》經典場面，更笑指自己係：「為保護驚姜虎東驚到發抖嘅知恩(IU本名)而嚟。」IU嘅出場令主持人歡呼不已，但IU隨即爆料稱：「我仲係新人時，曾上過姜虎東主持嘅節目《Star King》，但錄影近10小時，一句嘢都冇機會講。但係《好日子》呢首歌爆紅之後，(姜虎東)就變得對我好好。」令姜虎東大表尷尬。

隨後IU又大晒歌喉，猶如開小型演唱會，更表演新歌《BBIBBI》炒熱氣氛，至於李準基就示範自己嘅武打戲及重演成名作《王的男人》中「走繩索」一幕。

精選韓流，喺晒《娛果》
http://fb.com/appledailyent