周日（24日）沙田編跑三泥七草，草地用利追的全闊Ａ跑道角逐，三場泥地都跑短途，通常利前領放頭馬。騎練形勢，華籍馬房近期主宰了大局，特別徐雨石旺得交關，今次有幾匹新勝馬乘勝出擊，馬圈跟紅頂白，當然要優先留意。

第二場五班泥地1200米，葉楚航馬房「赤水神駒」初跑泥地是不明物體，此駒開鑼日出戰田草1200米，跟放入直路還未斷，最終負兩位半跑第六，表現唔曳，復課再投入積極備戰，潘頓過檔跟「僥倖」拍跳考驗，走外檔衝上壓倒對手，勁力貫注，最後試跑單試，表現則十分內歛，成熟狀態均邁進一步；今次轉戰泥地，記得八月中今季首次試大閘，後追表現甚佳，跟曾於泥地上名的「越影」同父系，本身夠噸位，有信心擅長跑泥地。

同場「天狼星」開鑼日田草1600米熱身，復課操養得宜，身形茁壯走勢硬朗，試閘跟放末段按實，大把在手，今仗跑番贏馬路程，坐位望贏之選。「永常喜」試泥閘輕鬆放返，可主動擺前走之馬，始終有着數。「御風雲」落班強配莫雷拉，復課操足，已具爭勝水準。「快趣的」剛戰谷草接近，返泥地更合適，不容輕視。「好準確」勤操勇態已起，未建功一定有戰意。「大將風雲」剛戰1400米比預期跑得好，四重彩冷腳。