翁靜晶早前揭發定慧寺帳目混亂、女住持釋智定與2內地僧人假結婚等醜聞，為保佛門清譽，翁於今年3月自發喺facebook成立「佛門警訊」，與一班正義之師四出派傳單阻止懷疑「假和尚」、「假尼姑」湧港。噚日翁靜晶去沙田萬佛寺派傳單時，遇上售賣「佛珠」嘅懷疑「假和尚」，2名阿根廷遊客願意錄口供頂證，奈何警方花逾3小時仍然搵唔到識英語嘅警務人員或翻譯員錄口供，最終要5個幾小時先正式落案控告。(詳見: http://bit.ly/1YsTSgd )

《蘋果》今日致電翁靜晶了解詳情，佢再爆seed鬧爆警方執法部門，特首梁振英更是責無旁貸，翁靜晶話﹕「如果有個好政府，阿特首都可以聆聽。好簡單，去了解下前線警員係咪真係咁多嘢做囉，如人手不足，係咪有啲嘢有人可以幫手做，文書工作多啲用電腦，唔好再寫紙填表，可以考慮用電腦通報。如果語言水平唔高，係咪可以好似以前考紅膊頭，考到加人工，畀佢哋多啲培訓，如法律知識缺乏，係咪又可以畀多啲培訓課程，我諗好多律師都願意做培訓員，包括我自己，我都好願意幫手，但你(特首)都唔肯出聲，唔去改革點搞呢？」

其實翁靜晶同「佛門警訊」團隊己非第一次報警，但翁指每次警方都會以不同原因「放人」，佢話﹕「點解咁怕拉人？因為要做好多paperwork通報，我哋經驗話你知，現在警隊教育水平係唔夠，英文唔得，中文亦都唔得，文字能力好差下，要佢哋寫咁多嘢，佢哋好驚，如果寫咁多嘢，仲要幫咁多唔同國籍人錄口供，寧願唔做。啲人更加踴躍嚟香港，香港會變成乞衣天堂囉。」

點解會成立「佛門警訊」？翁靜晶解釋﹕「因為我係一個好虔誠嘅佛教徒，唔想有人用呢啲方法傷害佛門。試過拉到人又放咗，改法例都講得出，太過卸膊，政府唔肯做，我哋幫佢，加上傳媒監察去報導。」

翁靜晶經常與疑似「假和尚」喺街頭對質，可擔心自身安全？佢話﹕「我好有禮貌同佢哋講，任何公義行為都有一定危險性。我信佛，我係信因果，天覺得我做嘢錯，我亦願接受懲罰，如天覺我啱亦得保佑。」