今日係保釣人士陳毓祥過世15周年，日本仲未滾出釣魚台，一班香港保釣分子決定勇衝釣魚台，仲要喺釣魚台上搞個紀念公園，畀香港人認識保釣歷史。大家放心，八方講緊嘅釣魚台，唔係日本仔賴死唔走嗰個，因為西貢都有一個。

全球華人保釣大聯盟副召集人吳兆華話，西貢布袋澳附近都有個半島叫釣魚台，嗰度景色靚。佢哋同西貢區議員商量緊喺呢度搞個紀念公園，但一切要喺選舉後才有機會成事。
噚日約20位保釣中堅齊集喺尖沙嘴鐘樓附近獻花默哀，紀念15年前到釣魚台宣示主權嘅陳毓祥，當年陳嘅船隻受到日本船艦強力阻攔，佢游泳宣示主權，不幸遇溺身亡。到場獻花嘅全國政協劉夢熊話，明年兩會前會爭取100至150位政協聯署，要求中央追認陳為愛國烈士。
另一方面，保釣行動委員會蠢蠢欲動，伺機出發再赴釣魚島。八方聽聞由漁船改裝嘅「保釣二號」，過去多次計劃到釣魚島宣示主權，但每次離港時都被海事處同水警派員攔截。保釣二號最近獲劉夢熊等人資助「整修」，應付海事處下周驗船。消息話保釣二號每月要花費幾千元請人照顧，若今次成功出發宣示主權，回航後好可能會賣咗隻船。