當年今日
關於我們

商場肥火雞失驚無神跟住你

蘋果日報 2002/12/20 00:00


聖誕老人企定定同人影相、擺個機動公仔喺度,到時到候郁身郁勢……今時今日咁嘅商場活動係唔夠。起碼嚟個搞笑大巡遊、火雞、布甸公仔周圍走,大派糖果、禮物兼同你又唱又跳,或者齊齊同聖誕老人Jam吓歌仔,咁先至夠High!
記者:李玉蘭
攝影:陳智良 部份相片由被訪者提供
太古城中心
布甸最愛伏匿匿
一支七呎高嘅香檳,唔知可以飲幾耐?兩隻手都抱唔起嘅巨型火雞、一個篤極唔爛嘅七彩大布甸、人咁高嘅士多啤梨蛋糕……又可以食幾耐?唔使擔心,因為呢啲統統都係有得睇無得食,只係擺喺太古城中心度,任你影任你摸,但一樣引得細路企圖揭開食物,大人猛吞口水!
重有,小心商場其中有啲食物係識郁㗎!只要你校啱時間,就會睇到一隻隻大大隻嘅火雞、布甸、雪人、聖誕老人組成嘅五人為食大樂隊,攞住樂器喺商場一邊打Band一邊同大家跳舞影相!注意!隻肥火雞最鍾意失驚無神跟住你,再攞隻雞翼同你握握手;布甸就鍾意同大家玩「伏匿匿」,睇你夠唔夠眼明手快捉到佢啦!




過百粒糖果從「星」而降
5至12歲細路只要夠「食力」,重可以試試墨西哥式嘅節日遊戲「擊出糖果」,邊個可以喺30秒內敲爛頭上高掛嘅紙星星,過百粒糖果就會從星而降,全部都會送晒畀你!玩到攰攰哋,就去「美味果汁泉」歎杯免費果汁,嗰度重有音樂小噴泉,啲水會喺啲蘋果上彈嚟彈去,好出神入化㗎!
節目查詢:25688665




又一城
聖誕老人帶隊出巡 完全冇偷懶
今年靚靚嘅「北極聖誕老人村」同往年好似差不多,但真正嘅賣點原來唔在於企定定嘅布置裝飾,而係在於周圍行嘅「大巡遊」!
今次聖誕老人喺商場出巡,無帶鹿車,反而帶咗一班識講中文嘅外國表演隊伍,包括小丑、魔術師、野女、技藝師、樂隊等,呢個以聖誕歌《聖誕十二夜》為名的巡行大隊伍,一啲都冇偷懶,巡勻成個商場,行行吓又會停低,使出自己最耍家嘅本領,做完魔術玩雜耍,唱完聖誕歌跳跳舞,原本影相閒逛嘅一家大細、情侶,都禁不住跟住跳埋一份!講真,大人細路跟住佢哋玩一圈已經好開心,點知採訪時,我哋發現有幾個小朋友拖着大人,跟着大隊玩足全場,為時一粒鐘都無叫腳軟,重笑得嘻嘻哈哈,好開心!
節目查詢:28442228





德福廣場+青衣城
50萬粒水晶閃令令 鎮場之樹
兩棵各用50萬粒施華洛世奇水晶、全人手做成嘅10呎高聖誕樹,成功成為兩大商場──德福廣場同青衣城嘅鎮場之樹。先講德福,水晶樹放咗喺一個有三萬粒水晶裝飾、鋪滿鍍金葉嘅玻璃旋轉樓梯上面,目的咪就係俾你近距離睇得一清二楚囉!兼感受吓水晶嘅矜貴!此外,商場通道兩旁重布置成平面藍天雪影,再加突晒出嚟嘅樹枝,樹上及天花板都掛有大量水晶吊燈,嘩,直情好似行咗入童話世界Shopping咁,好浪漫呀!至於青衣城嘅閃令令水晶樹會放喺一個仿布拉挌國家戲劇院嘅環境裏面,當你經過巨型拱門後,就可感受呢份富麗堂皇嘅氣息,真係搭多幾個地鐵站影相都值得!
節目查詢:28563288
新城市
聖誕老人匿埋帳幕耍雜技
聖誕老人雖然一把年紀,但依然身手敏捷,話要玩雜技畀大家睇喎。於是佢會企定定喺七彩Fancy大帳幕上面,不停施展唯一強項──拋波波!佢咁出力拋,目的只有一個,就係引你行多兩步入局,等你感受吓氣氛,欣賞吓企鵝玩搖搖板、扮空中飛人、踩波波等,Cutie到不得了!
節目查詢:26849175
荷里活廣場
誕老人玩夾Band 聖
廣場扮成一個聖誕音樂城,用巨型色士風、大鼓、豎琴等,喺一大六細嘅聖誕老人瞓身演出下,扭吓擰吓夾吓Band,歡迎你一齊唱唱開心快樂聖誕歌!
節目查詢:21188778
太古廣場
細緻水晶球 幫你揀禮物
傳說之中,聖誕老人會根據細路嘅個性派禮物,所以佢會坐喺瞭望台公園,透過水晶球,睇吓細路做啲乜,呢啲細路有啲來自風雪中嘅巴黎、星閃閃嘅伯利恒、七彩嘅俄羅斯……細心觀察,水晶球裏面嘅世界真係精緻到令人驚喜,玩具迷應該會好啱睇!
節目查詢:28014197