表明話要組黨嘅鄉議局,最近真係動作多多,因為繼組黨之外,噚日佢哋執委會又通過,拎成100萬出嚟搞研究部。實情搞研究部呢個提議,早喺2010年已經講過,噚日先至正式拍板,而到時研究部,會由鄉議局主席劉皇發嘅妹夫薛浩然打骰,以非義務性質負責執行研究部嘅工作。
更值得留意嘅係,呢100萬唔會放喺獨立嘅銀行戶口,而係由鄉議局總務委員會同埋財務委員會住。總務委員會主任鍾偉平話喎,呢個研究部又唔一定搞政治嘢嘅,研究吓新界土地規劃都得嘅啫﹗到底個研究部真正用途係乜?大家要拭目以待嘞。
組黨方面,原來鄉議局今個月28號再喺深圳開集思會。點解要上深圳開?有咩人去開?發叔同鍾偉平互相交波俾對方,極之耐人尋味。