67歲嘅薜家燕同囝囝石耀庭、彭家麗、李寧今日喺九龍灣出席「健康快車廿載光明行」，家燕姐表示08年有帶耀庭去河南體驗，等耀庭珍惜現時擁有嘅一切。

家燕姐透露明年係入行60年，加上《流行經典50年》好收得，有主辦單位邀請佢做紅館騷：「華仔（劉德華）因為受傷而騰出紅館檔期，娛樂商即刻入紙申請，但我聽講楊千嬅同側田都係攞嗰個期，每人攞兩、三日都冇乜問題丫，同埋千嬅同側田都會讓下啲前輩，我第一次處女紅館騷丫嘛！」會唔會叫黎小田幫手？家燕姐笑住話：「佢應該要幫我啦，我仲會請我心愛嘅嘉賓嚟撐我。」

其實嚟緊會喺紅館開演唱會嘅藝人，入行都有返咁上下年資，好似有69歲嘅阿姐汪明荃、70歲嘅鄭少秋、58歲嘅林敏驄、全員過晒半百嘅草蜢、68歲嘅許冠傑、一早過咗25對嘅譚詠麟等等...一班老友記要撲飛喇！

彭家麗談到護眼心得，佢指自己唔愛錫眼睛，成日為咗貪靚而戴有色嘅隱形眼鏡，佢仲話：「爸爸有白內障，佢膽固醇高，有少少上眼，我冇定期檢查，不過好少玩手機同電腦。」