當梁特表明不排除釋法解決宣誓風波之際，據聞律政司司長袁國強係反對，所以佢過往都幾度重申，認為可以喺香港嘅法院層面解決。之不過呢，中央對釋法似乎勢在必行，唔少人都關注，最後若然真係釋法，袁國強係咪唔辭職都唔得？而今日亦有大批法律界人士叫袁國強辭官，似乎佢都好大壓力。

八方聽聞，袁國強近日被人問及係咪會辭職時都有回應，據知佢都幾大局為重，認為如果一個人嘅辭職，唔會影響到個最終決定之時，相反若會惹嚟重大震盪，就唔會考慮，似乎暗示暫時唔會劈炮。據聞佢仲同人笑稱（定苦笑？），食得鹹魚抵得渴，坐得呢個三剎位，都預咗唔可以諗個人太多，仲形容個位係比預期鹹，難頂度大家都預計到。

而早前因為腸胃不適入院嘅佢，據聞健康麻麻噃，有傳佢因此盡力戒煙兼戒酒，公務應酬活動都盡量減少。噚晚喺經民聯晚宴都輕嚐淺酌，都係嗰句，健康要緊，多多保重！