小記者訪問玄學師傅幾次，覺得玄學玄之又玄，於是到工會之興趣小組學習子平之學，學曉好多術語，如食傷、財煞、印官，聽到左丁山頭都暈晒，要佢將術語翻譯成「中文」，先知佢講乜。
小記者約咗成個月，卒之約到師傅食晚飯，搵埋左丁山去學嘢，聽師傅指點迷津。師傅於去年十二月已寫咗一張○五年預測，交咗畀小記者，小記者睇咗第一條預測，已經嚇到唔敢講嘢，怕俾人鬧佢黐線，亂咁作嘢。小記者收得好密，連左丁山都唔知，此晚講起，問師傅攞張預言一睇，第一項預測原來係話：「董特首因腸胃不適，以健康理由辭職！」唉吔，中咗一半，董特首因腳痛辭職啫！

即刻睇埋其他嘅預言，唔講得咁多嘞，最關心一條就係恒指必破一萬三千八百點，直衝萬五點，恒指有機會試一萬八千點。左丁山立即向師傅話：「呢條最緊要中！」見到師傅，梗係問多啲，譬如話：「曾蔭權個相，做特首掂唔掂呀？」師傅話：「有啲運嘅，腳頭唔錯，不過不失，香港乃彈丸之地，細過中國一個縣，曾先生個相，做縣長綽綽有餘，做住兩年先啦！」
師傅平日同人睇相批命睇風水，當然收錢，佢以前替一個媒體評論命理，收到大量讀者來信，絕大部份都係來自草根基層，於是佢知道該媒體嘅受眾極多，以窮人為主。窮人問命本來冇相干，令佢大為感慨嘅就係：「我四十歲，老公大我四十年，有一子一女，大仔六歲，老公冇做事多年，靠攞綜援，請師傅幫我仔女改名轉運，脫離窮苦……」類似信件，師傅收咗好多，答無可答。師傅話：「咁嘅香港男人為禍下一代，七八十歲重要去大陸娶老婆生仔，啲仔女生出來就冇運行啦，生嚟做乜，如果我同佢哋改吓名就可以轉運……」左丁山搶答：「不如專心度吓三Ｔ。」師傅話：「我唔賭錢嘅！」