【韓流】《男朋友》繼續sweet 朴寶劍咀喬妹吊劇迷癮
黃Viu煲劇平台宋慧喬男朋友朴寶劍
由韓國女神宋慧喬孖朴寶劍主演嘅tvN新劇《男朋友》於上月28號喺韓國首播,港劇迷可於「黃Viu煲劇平台」追看,劇集將緊貼韓國免費播放,每逢周三及周四韓國首播後4小時後可收看,大約於香港時間深夜1時半播出。不過劇迷要留意,《男朋友》下周三同四(26及27日)都因為聖誕節關係而停播,喺《男朋友》下星期停播嘅日子,劇迷就可以喺「黃Viu煲劇平台」重溫頭8集,睇住喬妹同朴寶劍sweet sweet度聖誕。
《男朋友》上月一開播,收視即以8.683%創下tvN歷年水木劇嘅收視冠軍,第二集收視更節節上升,極速突破雙位數,以10.329%收視再創佳績,收視一路keep住好成績,開播四周人氣依舊,仲包攬電視劇話題性同埋收費台同時段嘅收視率冠軍。
呢個星期三同四《男朋友》就播出第7及第8集,當中第7集就講到首爾市長嘅女兒車秀賢(宋慧喬飾)同平凡青年金振赫(朴寶劍飾)感情繼續升溫,兩人甜蜜自拍之餘又互餵牛扒,更加肯定咗雙方嘅感情,不過第7集講到朴寶劍將調去束草酒店,令佢同喬妹唔會咁易可以成日見面。
到噚晚第8集,劇情繼續甜到漏油,喬妹同朴寶劍仲有唔少親密場面,甜蜜攬攬,不過戲肉就梗係結尾時,朴寶劍同喬妹終於上演劇中首場吻戲,真係睇到劇迷紅到面晒。而唔少人氣韓劇所以咁火熱,有指因為「第8集必有吻戲」嘅定律,今次《男朋友》亦依足傳統,睇嚟《男朋友》必定有排火紅。
「黃Viu煲劇平台」每年都會播出一套神劇,好似前年嘅《太陽的後裔》,仲有去年嘅《鬼怪》,今年要數神劇就必定係《男朋友》,除咗《男朋友》可以緊貼追看外,《太陽的後裔》同《鬼怪》同樣喺「黃Viu煲劇平台」全劇免費睇。而今個月同下個月都有唔少必煲韓劇喺「黃Viu煲劇平台」登場,除咗現時熱播嘅JTBC《先熱情地打掃吧》(金裕貞同尹均相主演)及tvN《雞龍仙女傳》(文彩媛、尹賢旻主演)外,下個月仲有SBS《福秀回來了》(俞承豪、趙寶兒主演)、tvN《成為王的男人》(呂珍九,李世榮主演)及KBS《為何那樣,奉尚先生》(劉俊相、吳智昊、全慧彬主演)免費有得睇,劇迷真係唔好錯過。
另外,「黃Viu煲劇平台」除咗有韓劇煲外,都仲有好多唔同種類嘅劇集及節目,好似中港台劇《你和我的傾城時光》,又有日本動畫《棋靈王》、《龍珠超》、《男兒當入樽》等等追看,連埋亞洲綜藝、泰劇等,全部節目都免費任睇。
精選韓流,喺晒《娛果》
http://fb.com/appledailyent