李八方online｜律師會帶學生參觀7紀律部隊 否認助警隊學生修補關係
蘋果日報 2020/12/10 14:31
律師會警暴警民關係紀律部隊
律師會今年「青Teen講場」活動主題為「推紀及仁（Law & Enforcement）」。本報記者攝
唔知係咪要回應特首林鄭月娥早前批評，香港年輕人守法意識薄弱呢？香港律師會宣佈已搞咗10年嘅「青Teen講場」活動，今年主題就係「推紀及仁（Law & enforcement）」，話希望向全港中學「推廣法紀、宣揚仁愛同尊重」。活動最特別之處莫過於安排參加同學參觀7個紀律部隊設施，再以「推紀及仁」為題發表觀後感，被評選為最佳感想嘅頭10名學生，獲送一部Apple Ipad Air。
香港律師會否認今次活動是幫警隊與學生修補關係。本報記者攝
7個可參觀嘅紀律部隊包括警務處、懲教署、海關、消防處、飛行服務隊、入境處同廉政公署。活動籌委會主席湯文龍話，呢個特別安排係因為去年嘅社會事件後，聽到好多同學話覺得香港唔同咗，並對社會有好多疑問，「包括成日話有咩『警暴』」。佢覺得最好嘅解決方法就係安排年輕人親身同紀律部律接觸溝通。
佢講明即使同學參觀後，發表嘅觀後感仍然否定警隊做法，只要論點有基礎，律師會都唔會因此畀低分，令佢哋減少得獎機會，強調今次活動唔係由幫警隊同學生修補關係嘅角度出發，只係想雙方多啲溝通，令年輕人更了解紀律部隊平日點做嘢。
律師會副會長陳澤銘亦話，律師會作為獨立組織，「同政府無任何嘅聯繫，亦都無責任同政府做任何公關」，今次係用自己嘅角度去推廣法治，考慮活動主題時同政府嘅政策無直接關係。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！