好玩都市：
夜場新招 螢光骰盅𠝹女實中
𠝹女新招登場！螢光骰盅，騎呢指數爆燈！
螢光骰盅製作簡單，放4至5條螢光條入骰盅，凌空搖骰時骰盅會變得五顏六色，藉以吸引女仔注意，𠝹女初哥Mark仔說：「唔係我發明㗎，我跟班Friend有樣學樣咋！事實證明Work，因為吧場咁黑，玩螢光骰盅夠晒招（搖），騎呢就騎呢啲，但𠝹女呢家嘢，最緊要你夠面皮厚啫。」
記者：陳彩記 攝影：Jacky
場地：City2 模特兒：Lydia
1. 初出擊即得手
Mark仔先打鄰枱兩個女仔的主意，因為她們的樣子比較友善。「就算佢哋唔Like，斷估都唔會爆粗鬧我啩！」手執螢光骰盅的他，只兩板大話骰的時間，就取得她們的手電號碼。
2. 再出擊嚇怕人
稍事休息，Mark仔另覓目標，見對方單身一人，更添信心。可惜出師未捷，玩凌空搖骰失敗，忙着執骰，異常狼狽，對方只好勉強和他猜兩板，神情敷衍。
3. 三出擊Model笑爆嘴
Lydia（17歲）：「真係未見過有人揸住個螢光骰盅嚟𠝹女，太騎呢啩，如果𠝹我嘅話，我諗我會忍唔住笑囉！」
結果，除了Model，三個美少女中取得兩個電話號碼，成功率超過一半。
怕醜仔靜觀其變
「我班Friend簡直係超級𠝹女兵團，總之落到吧，一見到邊張枱清一色係女仔，就第一時間湧埋去，佢哋唔怕醜㗎，猛問啲女仔可唔可以一齊猜骰盅，人哋都未應承，已經懶Friend咁坐埋一枱。」Mark仔為人怕醜，每次出動都只係「靜觀其變」：「我通常都唔會跟住去，咁猴擒，嚇親啲女仔硬食檸檬咪好瘀？佢哋坐定定喇，我再埋枱都未遲。」
上月中秋節，Mark仔又如常與這班𠝹女王落吧消遣，當晚各人情緒異常高漲，「中秋節關係啩，成棚人都玩得好High，五個人，半粒鐘，話咁快就飲晒兩打，其中一個Friend瞄到對面枱啱啱嚟咗班超索嘅女仔，建議齊齊過去𠝹女。」從不當先鋒的Mark仔一如以往，自斟自飲，伺機出動。
自創玩意勁Work
「停！」𠝹女兵團其中一人喊道：「今日玩得招啲，搞搞新意思。」Mark仔摸不着頭腦之際，但見有人取出剛玩剩的螢光條放入骰盅內，手一揮，來一招凌空搖骰，骰盅頓時幻化成一片螢光，還邊搖邊笑說：「螢光骰盅，咁至夠招嘛！」
「實在太騎呢，莫講話我不嬲都唔做急先鋒，比着其他Friend都頂唔順，點都唔肯拎呢個所謂螢光骰盅去𠝹女。」眾人表態不去，發明者單人匹馬出戰，邊凌空搖骰邊上前搭訕，結論是：「勁Work，我聽住班女仔主動講：『咁得意嘅，一齊猜枚吖！』聽清楚，係主動，係班女仔主動叫我個Friend一齊玩。」場面縱然惹笑，但不得不令Mark仔佩服。
失手被瘀 等於有位入
自此，Mark仔與𠝹女兵團落吧，例備螢光條：「證明條橋係Work，咪繼續用囉！我都認騎呢㗎，不過𠝹女最緊要玩得起唔怕瘀，吸引到女仔注意就自然吹到水，吹到水就等於有位入，有位入先有下文嘛。到𠵱家為止，我都攞到差不多十個女仔嘅手提號碼，不過我凌空搖骰好唔掂，成日喺女仔面前跌骰，好瘀好搞笑！不過又係嗰句，瘀都唔緊要，因為女仔肯瘀你，等於畀位你入，有繼續吹水嘅餘地。」
𠝹女初哥小檔案
Mark仔
年齡：22歲
𠝹女年資：半年未夠
一星期蒲吧至少3次，跟朋友用螢光骰盅𠝹女。「如果攞到女仔手提號碼就叫成功嘅話，咁𠝹女成功率一半一半啦！」
Mark仔小貼士
一定要細方骰配圓頭黑盅，骰仔太大又或者盅口太細就玩唔到！