幾十年前，世界上仲未有互聯網呢樣玩意，甚至排位馬紙都未面世，馬季開鑼嘅首次排位，翌日報章比平日必然好賣好多。嗰時暑期長達四個幾月，又未興賭波，電視亦冇得睇衛星直播外國球賽及賽馬，馬迷「餓馬」的確餓得相當辛苦。然而，排位之後，一般馬迷冇辦法即日睇到，要等翌日報章刊登，先至有機會瀏覽。所以，平日唔多睇報紙嘅馬迷，嗰日都一早響報攤守候。一有報紙運到，唔理乜報紙都好，只要有馬經就立即買之哉，務求先睹為快。
買完報紙，好早，當然上茶樓歎番一盅兩件，坐低嘆番壺香片，睇真啲個排位表。驟然發覺，身邊志同道合嘅人好多，事關大家都做緊同一樣嘢。而搭檯之人，亦互相搭訕，充當權威馬評家，發表偉論，講邊隻好邊隻唔好。飲完茶，不免逼巴士上班。不在總站上車，梗係冇位坐，只能化身車廂裡其中一尾沙甸魚。但仍然唔想浪費時間，幾逼都好，冇碇企都好，點都要繼續睇報紙上嘅排位表，雖然份報紙可能攤響其他乘客嘅背脊。
返到公司，一個又一個同事問第一個問題係：「你睇咗排位未呀？」時移世易，排位翌日會做嘅嘢，家陣好多提前響排位日做咗。排位翌日，大抵已背得出不少參賽馬。