周柏豪噚晚喺灣仔會展舉行嘅「新城勁爆頒獎禮」，得到勁爆男歌手獎同勁爆歌曲獎，柏豪話：「冇諗過今年有機會攞獎，以為自己派歌唔多，年尾好多傳媒公佈歌曲成績，發覺自己都攞咗唔少冠軍歌，有啲機會，今日仲見番好多舊同事。」

傳聞星夢同環球唔高興新城頒太多獎畀李克勤，所以兩間公司都杯葛唔出席頒獎禮，柏豪即避重就輕咁話：「我唔知道原因，只知唱片公司係唔出席，我今年比較特別，因為轉公司，橫跨兩間公司，我唔可以抹殺其他單位嘅努力，所以我堅持四個頒獎禮都會出席，就算冇獎都會去支持樂壇，但我尊重公司決定。」

柏豪話冇問公司點解唔出席，仲話自己都係呢幾日至知呢個消息。公司有冇叫唔出席？柏豪話：「我知道公司唔嚟，但我決定嚟，我有解釋原因，每個單位都會有自己原因，我唔影響佢哋，佢哋亦唔左右我。」公司會唔會嬲？柏豪就話得到公司支持，自己亦可以獨立。老闆何哲圖得獎都唔出席，係因為忙搞頒獎禮嘅嘢。

更多娛聞，喺晒《娛果》
http://fb.com/appledailyent

【minigame】2017瘋暈人物 返工打機唔使擇日
http://bit.ly/2CeWQkP