莫雷拉連續兩個星期三跑馬地夜賽都無頭馬見面，情況罕見。但莫雷拉如食白果的話，往往於下次賽日都大發神威。如本月13號莫雷拉只有兩場入位，但本月16號全日以5冠2亞1季佳績埋單，看看今個賽日（24日）是否屬於莫雷拉天下。

第八場三班1200米泥地，「雲信凡高」上次初跑泥地同程經已高度留意，事關上季中曾試泥閘出色，而且今季初出跑1000米其實表現不差。唯一算唔到上仗初跑泥地，牠放頭博走甩，僅敗屈居亞軍，今次對手實力大減，可望贏馬。

同場「劍飛聲」八歲老馬上季尾開始復甦，更於四班同程贏馬。賽前泥閘走勢悅目，惟現評61分未知心意如何，但老馬利季初，輕磅及承接上季尾佳態，可重視。

第十場二班1400米，「怪獸家長」上仗同程走蝕位情況下，輸俾「蒙古王」、「太陽喜喜」屈居季軍，但末段仍造出全場第二快時間，加上同程跑9次獲3冠1亞3季佳績，上名率高達一半。上季至今莫雷拉騎何良馬8次，獲得3冠1亞，賽前「怪獸家長」落草地試馬動態積極，可勝。

同場「公証揚鳴」健康曾出現重大問題，操練就住就住，今季無大閘，但上仗跑1000米熱身開氣表現引人，末段爆21秒95。今次增程至1400米，同程曾上名，外地亦曾1350米贏馬，熱身後可近。「蒙古王」上次閃住贏馬，末段姿態仍輕鬆，繼續排好檔人馬合拍，徐雨石保持旺勢，可兼顧。