近年飽受傷患困擾嘅美國高爾夫球前一哥「老虎」活士，周四喺twitter上載自己揮桿打波嘅短片，仲話：「醫生批准我練波喇！」今次係活士自四月接受手術之後，首次喺公開場合打波。

現年41歲嘅活士喺過去兩年內，只係打過三場比賽，佢喺上年由自己舉辦嘅英雄世界挑戰賽並列第15名（總共18人參賽），但今年一月底嘅農夫保險公開賽又慘遇淘汰，一個星期之後因為腰部不適而退出杜拜精英賽，之後就進行第四次腰部手術。