現年37歲嘅鍾欣潼（阿嬌）今年2月承認接受32歲台灣男友、「醫界王陽明」賴弘國閃電求婚，一對準新人未開始籌備婚禮。噚晚阿嬌孖住未婚夫賴弘國，約埋盛品儒同老婆蔡一鳳食晚飯，盛品儒將兩pair人合照放上社交網，佢仲留言：「開心聚會，祝阿嬌和Michael永遠幸福。」

蔡一鳳於2014年嫁給盛品儒，恨生BB嘅佢哋去年底造人成功，《蘋果》今日問到蔡一鳳可有向阿嬌傳授生B心得，蔡一鳳就話：「唔好講笑啦，佢老公以前婦產科，佢傳授我就差唔多。」原來蔡一鳳喺農曆新年到外地進修完，返港立即約阿嬌飯局，互沾旺氣。

蔡一鳳話獨自到西班牙同英國報讀建築設計與管理碩士學位課程增值，入讀嘅係喺歐洲排名前十位商學院：「可以入讀到好開心，但返嚟成日好攰，有時一日瞓成十幾小時。」o依家陀B約5個月嘅佢仍有孕吐情況，有時要吃話梅止嘔，由於胃口唔大，體重約112磅，預產期喺今年7月。

精選娛聞，喺晒《娛果》
http://fb.com/appledailyent