俾like呢樣嘢，真係真係唔好亂俾，特別係藝人名人。互聯網上，係冇秘密0架！就好似之前舒淇喺IG上like咗一張Angelababy「二分鏡」貼出佢「唔同樣」嘅相，馬上俾該IGacc.嘅網民不斷出po，宣揚舒淇都like呢個IG版「樣子兄」嘅貼圖……好尷尬。

祖兒容祖兒都有IG，佢最近都like咗個po，但呢個po……有少少尷尬。呢個po其實係一張cap圖，圖中有呢句句子:「開始分不清，有些人是真心為社會發聲真心有話要說，還是借勢騎劫政治扮關心社會而最終目的其實是搏like搏hitrate搶airplay。」貼po嘅網民並寫道:「啱啱見到frd嘅呢個post，簡直講出我嘅心聲，有啲人擺明係人做咩佢要做咩，人去佢又要去，湊熱鬧。」祖兒就俾咗like。

不少網民——同埋高登仔，就好自然咁聯想到，最近謝安琪喺7.1之前plug嘅一首歌——《雞蛋與羔羊》。有不少網民質疑謝安琪此舉是否抽水，幸而一眾歌手包括明哥黃耀明、何韻詩、吳彤等都予以力撐。但亦因為咁，祖兒like嘅呢個po，咁啱又有句「搏like搏hitrate搶airplay」，令人好自然就諗緊……又hitrate又airplay，估斷都唔係講緊普通網民啦……更重要係，祖兒同人妻Kay謝安琪，係競爭對手嚟0架嘛。除咗祖兒本人俾like，佢嘅fans都俾咗like。

有人就話:「為左咁而要冒險被大陸封殺，起碼某女歌手唔敢做先。」轉貼「搏like搏hitrate搶airplay」呢個po嘅網民，為免事情越抽越黑，故回應網民時已經講明:「我呢個post完全同謝安琪無關，我亦唔知佢plug歌。」結果該網民即反應道:「我都無講過話係謝安琪，你唔使澄清喎。」

網民紛紛留言，有人歎道:「有誰願意失去中國這個市場？美國大片也要討好，好嗎？我係歌手就學鄧紫棋啦或者明哲保身啦。」也有人留言:「嘩，做咩謝小姐班fans咁惡嘅？無啦啦對號入座仲要走嚟鬧人。」、「其實這個post只係想表示一些人羊群心理，不要對號入座。」