當年今日
關於我們

【收市閒情】官媒奇文 令港交所變「打鱷功臣」 (千頌C)

蘋果日報 2019/09/17 20:19

港交所索羅斯千頌C

大家經歷過去3個月嘅風風雨雨,睇到嘅除咗係港共、克警是如何無恥外,更重要係你會發現,原來你班人真係唔識㗎喎!
話說近期港交所(388)向倫交所提親,八人大轎去到門口,點知人哋一句:「傾刁?不了,請回。」再大喝一句送客,港交所就面懵懵,死撐講句"I will be back, Juliet."
事實上,單刁本來已傾得唔啱時候,都唔講特朗普吹雞全球反中資;香港一場逆權運動,令全世界都知香港赤化中。英國家陣脫歐存亡之際,哪來閒情逸致同你搞私奔另起火頭?
更好笑係,中共喉舌日前出咗篇奇文,《做空港股突襲投行 唱淡配合索羅斯夥漢奸黎策動暴亂變天》。內文大約係話,索羅斯策動金融戰,去配合顏色革命,仲一次過沽20萬張期指,嘩!一聽就知勁,足足多過佢98年時一個double!(黎智英喺篇文嘅角色純粹係做標題 )。
劇情講到9月4日,港股因林鄭英明,成功爭取林鄭撤回送中條例,令港股大升,內文講到「索羅斯發現事與願違、形勢不利,9月5日開始大手筆拋出期指空單,企圖最後一搏。」點知!第二日天滅Soros,港股期貨死server,2點仲停埋市,令索羅斯慘蝕24億,再次敗走香港!據報道,今次打而大鱷最大功臣,今次唔再係「因北京出手相助」,而係港交所使出一招:關門打狗!嘩!李小加睇到呢度唔知唔會嚇到飆汗,文內提到「有消息指,港交所『趁機』打大鱷,而這個大鱷就是企圖捲土重來的索羅斯。」
假設官媒所言屬實,即係話,港交所係會為咗達成某啲長官意志,不惜扮死機兼停市;犧牲嘅係一大批機構投資者、輪商、散戶,以至係港交所多年建立嘅聲譽及公信力。講多次,係官媒講,呢類鬼故真係信不信由你。
港交所今次提出收購,市場一般相信係為政治買保險嘅交易,總算係做緊國家任務;但官媒今次將「停市打大鱷」咁大個功勞,硬質畀港交所,變相喺佢頂花轎放多個白燈籠,提醒英美,「單刁有伏呀,港交所好可能已變『黨交所』啦」。想單刁成事?首先封住啲大配角把口先,如果唔係?結局咪就係好似羅密歐與茱麗葉咁,攬炒!
by千頌[email protected]堆填區
http://fb.com/winbigwok