由全智賢、河正宇同李政宰主演嘅韓片《復國者聯盟》自上月22號喺韓國上映以來，票房成績都屢創新高，截至噚日上午11點15分，《復國者聯盟》嘅入場人次已經達到1050萬1084人，已經超過荷李活大片《復仇者聯盟2：奧創紀元》（Avengers:AgeofUltron）之前保持嘅1049萬4499人嘅入場人次，《復國者》上映唔夠一個月即打低《復仇者2》，暫時成為2015年嘅票房榜冠軍。

《復國者》係大肚婆全智賢嘅新作，所以唔少人都好期待，好似喺日前光復節嘅單日票房就高達75.1%，亦成功突破咗1000萬人次大關，同《復仇者2》一樣都用咗25天就過千萬大關。

而《復國者》就創造咗今年韓國電影最高預售率紀錄（54%）、最高首映日紀錄（47萬7600），影史單日票房榜第二位（95萬人）。首周末24小時內突破100萬人，並接連創造今年韓影100萬、500萬等各階段最快速度嘅票房紀錄，認真犀利。不過由劉亞仁同黃政民嘅《老手》亦不容忽視，佢哋嘅票房走勢拍得住《復國者》，至於最後邊個贏就要睇吓邊個叻打持久戰。