《蘋果》娛樂全新節目《關你影視》，結合影評、電影資訊，同你開住Live講戲。啱啱播出嘅第六集，再次請來電影導演郭子健（Derek）做嘉賓。臨近萬聖節，恐怖片紛紛出爐，對於恐怖電影，Derek原來都好有研究，仲話近年最欣賞嘅就係大熱作《詭屋驚凶實錄》（The Conjuring）：「導演溫子仁好識設計恐怖元素，同設計喜劇、偵探、動作都係一樣，你要一個好循序漸進，由氣氛至鋪排，每一個段落設計俾觀眾，講就好簡單，實行起上嚟唔係咁容易。」Derek最鍾意《詭屋驚凶實錄》設計夠簡單，環環相扣，又唔需要乜嘢特技：「係好細個睇嘅恐怖片嘅感覺，但好耐無人做。」

提起鬼片，當然要數亞洲嘅作品，當中日本就做得特別出色：「90年代鬼反而唔係咁多，有好多怪獸式嘅恐怖片，到2000年之後嘅恐怖片已經無乜令到我好驚，反而出現咗個支流，就係恐怖嘅日本片，《午夜兇鈴》、《咒怨》咁，我覺得日本人拍恐怖片好叻。」除咗日本，當然唔少得曾於香港盛極一時，本土製作嘅鬼片：「恐怖片係其中一個香港主流類型，香港幾大特色，一係拳頭暴力片，一係枕頭色情片，第三就係恐怖片。」佢最欣賞香港恐怖片將唔同元素揉合：「恐怖片佢又加啲喜劇落去，又加啲色情落去，全部都係人類最本能式嘅嘢，性、恐懼、暴力、笑，呢啲全部都係賣座嘅嘢。」

為咗迎合大陸市場，香港近年已甚少鬼片，又或者拍出一大堆無鬼嘅「鬼片」，搞到不淪不類，對此Derek都好感慨：「如果再拍返呢類戲，就唔好嘗試去取悅內地嘅市場囉，你要話：其實無鬼嘅，又有乜意思呢？如果要拍就直接拍！只要咁做先有機會行到條血路出嚟。」仲透露自己都想開套鬼片添！

場地：小時光

精選娛聞，喺晒《娛果》
http://fb.com/appledailyent