基本法委員會委員劉迺強無厘頭發出一個「香港再出發宣言」，一次過在九份報章刊登宣言全文，又設立網站畀市民參加聯署，聲勢十足，呢份宣言果然擲地有聲，網上聯署人數直線上升，噚日下午最高峯時逼近8,000大關，好誇張。
網民踴躍聯署，署名包括「李克勤」同「馬力」，又有「七一上街」、「凉薄英」等人，可能不堪受網民挑戰，劉迺強噚日下午強力洗版，一舉將7,000幾個疑似玩嘢聯署刪除，好似六四屠城咁眼都唔眨就「平亂」，僅餘下幾百個相信係自己人嘅名字，至於前日一度消失咗個留言區，噚日重開，不過有句紅字「報警宣言」，劉迺強警告網友勿再生事，「請勿嘗試破壞此網頁！所有破壞行為我們均以紀錄IP，并交由警方處理」。

一直有紀錄IP資料

劉迺強呼籲市民和諧，口口聲聲要團結令香港再出發，估唔到卻帶頭召喚警察「凶」網民，八方問佢點解發出「報警宣言」，佢連聲稱nocomment，至於有冇將網民IP交畀警方，佢話一直有紀錄IP資料，但暫時冇交予警方。提出「和諧」宣言卻變成眾矢之的，甚至成為激發市民7.1上街議題，劉迺強話不猜測7.1遊行人數，網民反應在意料之中，「更加堅定我哋睇法。」
睇法堅定，實際行事卻可以好有彈性，接受八方查詢後幾個鐘頭，劉迺強噚日傍晚時分又將網頁更新，上述「報警宣言」不提等於不存在，紅色警告字眼改為溫馨提示：「請尊重自己言行，勿嘗試破壞此網頁」。
政界對「香港再出發宣言」背後目的估估吓，有人思疑係為疑似特首候選人搭台造勢，亦有人忖度係為政改方案出台鋪路，但無論如何，大部份人認定西環一定有參與其事，事關若冇「第二支管治隊伍」介入，仲邊有人有如此人力物力搞呢場大龍鳳？
香港再出發網站唔畀大家隨便留言、聯署冇乜所謂，劉迺強可以洗版，卻阻止唔到大家上街，唔認同呢個宣言嘅人，八方認為亦冇必要同劉迺強糾纏下去，總之7.1再在維園出發。
mailto:[email protected]