立法會建制派有個WhatsApp群組，用嚟協調、調動以及通風報信。最新一期《壹週刊》報道，立法會主席曾鈺成上周四喺政改表決當日會議上，喺人民力量陳偉業返回議事廳時，透過WhatsApp向建制派指：「賊來了」，呢個訊息係出現喺民建聯「博士」葛珮帆嘅手機中。
報道出街後，陳偉業噚日話攞埋報道向曾鈺成求證，對方證明確有此事，即係曾鈺成的確以「賊」稱呼大嚿，所以大嚿噚日透過傳媒，公開譴責曾鈺成，話佢作為主席，應該公平、公正咁去主持會議，咁樣話議員係「賊」係唔尊重，要求曾鈺成向佢道歉，日後唔好再咁話議員。

曾主席冇耍冧

但佢話同曾鈺成求證時，冇要求對方道歉，所以曾鈺成亦冇向大嚿「耍冧」，大嚿話：「佢冇向我道歉，我亦冇要求佢向我道歉，我同佢講，我會公開譴責佢。」而曾主席被問到會唔會向大嚿道歉時，佢反問八方點解？因為佢相信陳偉業對「賊」呢個稱呼感到好自豪，唔認為自己要道歉喎。