符號嘅威力，有時遠勝千言萬語；而今年嘅香港，一把黃傘，則代表爭取真普選不死嘅決心。但支持真普選，或者等同與北京作對，好敏感㗎嘛，香港公開大學就好識時務，佢哋早前拍咗一條自我宣傳嘅短片，由公大管理層粉墨登場，一人一把黃傘砌出哈哈笑圖案，點知出街冇耐就下架，直至最近先重新出街，但原來嘅黃傘已經唔見晒。
八方喺公大網頁搵到一啲蛛絲馬迹，發現呢條半分鐘短片應該喺運動爆發前拍攝。公大喺網頁話，「宣傳片由一眾年青及充滿活力的公大學生擔當主角，公大管理層亦粉墨登場，在宣傳片段中亮相，盡展公大的澎湃活力及創意」。

網民鬧爆：衰過文字獄

講到活力同創意，梗係100分啦，皆因24位公大高層包括港區人大代表、校長黃玉山同學生，人人打開一把黃傘，砌出哈哈笑圖案，一副望見美好將來咁款。公大事後似乎知道「瀨嘢」，短片早前被消失。
噚日OUHK Secrets嘅facebook網頁公開咗最新一條短片，一把黃傘都睇唔到咯，統統好似「拳打腳踢」呢四粒字咁遭剪走，網民鬧爆公大自我審查：「一見到黃傘就咁驚，衰過文字獄」、「自我閹割，最恐怖」、「一把傘原來可照出人的真偽」。公大發言人回覆指，宣傳片攝於今年7、8月，第一期宣傳已於10月底完結，第二期已於上月底推出，「所有的廣告宣傳片與政治無關」，但冇解釋點解「新一輯」短片黃傘被河蟹而唔見晒。

李八方
mailto:[email protected]