立法會財委會下午開會，點知鬧爆政府嘅唔單止係民主派，而係經常保皇嘅財委會主席陳健波。會議上討論政府向立法會攞錢，喺環保署開設一個助理署長常額職位，月薪16至18萬元，推動減廢、回收工作同回收業嘅發展。但香港嘅回收工作向來都做得差，議員要求政府交代攞錢開位之後，回收工作點樣改進，但政府答極都答唔出。陳健波更破格鬧爆政府：「我會向政府投訴，你哋冇準備，答唔到議員問題。」

朱凱廸批評，政府現時每一季只係做到500公斤至1,500公斤嘅塑膠回收工作，「呢個業績係非常之荒謬」。公民黨陳淑莊亦都話，民主建制兩派都好不滿政府嘅減廢回收工作，即使今次支持撥款，但若繼續做得咁差，唔會再支持環保署開位嘅撥款。

問咗成個鐘，政府都係帶議員遊花園，只係不斷重複現有工作，主席陳健波都頂唔順，力斥政府喺回應議員提問時，全無準備，講唔出攞錢開呢個職位有咩好處，官員難以向社會交代：「政府今日呢個答案係非常之差，好多議員都問緊，有咩成效指標，究竟你呢個新位，同舊時有咩分別？有咩新嘅宏願，但你一路都講唔到，如果你繼續係咁，好難怪啲議員咁不斷問你哋。」

陳健波講明，會向政府投訴：「如果官員繼續係咁答嘢，真係好令人失望。」但佢話唔能夠再無了期畀議員問落去，但支持議員繼續透過書面追問政府。工黨張超雄大讚陳健波，話好難得佢講咗句公道話。