正所謂一不離二，無綫一向喺劇集鍾意廣告植入，仲間唔中hardsell到好離譜，亦唔再係飲飲食食、生活用品嘅層次，今次係為佢自己賣廣告，問你點估到，近日唔止一次喺長命劇《愛‧回家2》當中介紹「高清翡翠台」改為J5台。

好熟呢!?之唔係大台無啦啦喺J5台黃金時段，播45分鐘普通話新聞報道兼簡體字，即惹網民反感，但無綫發言人表示，「翡翠台與J5開始完全分途廣播，將以往在明珠台的普通話新聞改在J5播出是自然的事，翡翠台和互動新聞台用繁體字幕，J5普通訪話用簡體字幕，新安排既可為觀眾提供更多選擇，亦照顧不同的需要。」

《愛‧回家2》上周五播出嗰集已經硬銷改名為J5嘅「高清翡翠台」，內容出自張振朗把口，向劇中老竇麥長青闔家介紹J5有幾好睇，劇情安排張振朗同屋企人詳細介紹無綫幾個台將會有乜嘢變動，包括分途廣播嗰啲，講足分幾鐘，硬銷J5台有變動。

點知噚日播嘅第966集《愛‧回家2》，又嚟料喇!今次就係麥包麥長青去馬家食飯，劉丹忽然話要追劇睇《公公出宮》，麥包同佢講85台已經變咗J5台，專門播放財經同知識節目，又大讚「畫面幾靚」，介紹睇唔到明珠台，同你講要再搜台，又介紹晒「81台係翡翠台、82台係J2台、83台係互動新聞台、84台係明珠台、85台係J5台」。

hardsell味出晒嚟，為咩要硬插「劇情」，講完一次再講一次……何苦呢!?