世界盃今晚就開鑼了，東道主俄羅斯對沙地阿拉伯將會揭開戰幔。而《蘋果》會每日5點半同大家跟進下當日比賽嘅最新情報，務求令到大家一收工就準備好心情等睇波！

今晚只會上演一場比賽，香港時間晚上11點俄羅斯對沙地阿拉伯，將會喺俄羅斯首都莫斯科嘅盧日尼基體育場開波，現場可以坐81,000人，相信今晚都會座無虛席。比賽開始前，亦都有開幕禮，屆時將會有英國歌手「壞孩子」Robbie Williams表演，仲有「大哨」朗拿度粉墨登場，有興趣嘅球迷都可以留意。

講返場波，雖然被譽為「史上最弱揭幕戰」，但今日兩隊都可精銳盡出，陣內無傷停問題。東道主務求旗開得勝，一吐8個月不勝污氣，相信會相當主動；不過，沙地對上一場友賽只係1:2險負德國，證明都唔魚腩得哂，預料都有一場惡戰。現時莫斯科嘅溫度大概係攝氏15度，有啲雲，希望天公造美，唔好落雨喇。

最後嘅最後，當然要講邊到有得睇！今晚免費台viutv99台將會直播比賽，睇完宮心計同飛虎先轉台都未遲，祝大家有個愉快嘅世界盃經歷，聽日再見！

《體蘋果》陪你睇波講波
https://www.fb.com/appledailysports
--------------------
王道日本足球手機遊戲《BFB CHAMPIONS 2.0》，日本國家隊實名登場！ http://bit.ly/2xrTKGM
--------------------
一網睇盡
足動世盃 直擊俄國最前線 https://hk.feature.appledaily.com/worldcup2018/