大台因為喺反修例運動入面報導偏頗，搞到唔少廣告商割席，收入減少，管理層即刻決定縮皮慳啲使。重災區之一製作部，炒人之餘，《兄弟幫》、《今日VIP》都宣布壽終正寢。

10年前開始主持《今日VIP》嘅吳家樂，面對突如其來嘅變動，佢都好正面面對，喺微博度話：「咁多年來我真係學到好多嘢」。不過，佢都自嘲話自己腳頭唔好，因為當年《K-100》同《歡樂今宵》，家樂都有份做最後一集。

雖然家樂係其士集團嘅女婿，唔使為兩餐頭痕，不過其實佢都好貼地o架，呢日佢同結咗婚13年嘅老婆周蕙蕙出街，兩個已經係老夫老妻，都傾到雞啄唔斷。見到佢兩公婆去醫肚，都係揀平民餐廳，仲唔介意坐得迫夾，點估到佢哋係上市公司太子女同女婿呢？

雖然《今日VIP》玩完，不過大家唔使擔心，因為家樂唔單只做主持，仲有好多劇拍，好似《唐人街》同《機場特警》，但係就仲未知幾時先播呢？

-----------------------------

【壹週刊直播平台 ChannelNEXT】

全城抗暴 區區論壇同你深度剖析

立即睇



-----------------------------

【升級壹會員登記站 為你解疑難！】

親臨旺角做升級壹會員，即送「香港人：抗爭之夏」限量明信片

詳情地址