香港首支職業籃球隊東方噚日見傳媒，仲有足球隊拉隊捧場，信心十足嘅總監梁守志講明要盡擸冠軍！要完成呢個目標，首個挑戰就係下周二高級組銀牌對永倫，屆時洋將班尼斯（Chris Barnes）可以上陣搏殺，肯定好睇過戲。
東方今季招兵買馬，吸引李琪、鄭錦興同陳兆榮等猛將來投，仲打正職業旗號，當然雄心壯志。除咗贏盡冠軍，總監梁守志仲有兩個願望：「希望四年內可以有專用籃球場；東方變得強大，要擊敗我哋就要更強大，想香港有更多職業籃球隊出現。」副總監李偉倫透露，考慮休季期間參加東南亞職業賽，最終目標係贏亞洲冠軍。

倒戈李琪：訓練有成效

講番對永倫場波，班尼斯嘅簽證有少少手續要搞，但下周二肯定可以上陣；佢話自己好想對永倫，因為係一場大戰，仲透露自己鍾意入樽，希望可以show畀大家睇。教練譚偉洋就力撐球員經驗夠、後備力量好：「呢啲都係優勝過永倫嘅。」唔做教師投身職業籃球嘅李琪，亦好期待倒戈：「全職多咗時間去改善技術細節，最緊要休息好咗，訓練成效都好啲。隊波舊年九月就開始集訓，就係為咗下星期場波。」