無綫過氣花旦陳復生嫁入豪門後做少奶奶，已經淡出幕前多年，近年專心同何東家族後人老公何東舜銘做慈善事業，又頻頻穿梭京港做民間外交工作，噚日突然傳出消息，指陳復生已經申請離婚，成為豪門家變女主角。
以前陳復生同老公成日孖公仔出現，十分恩愛，據接近陳復生人士透露，陳復生約於上月底入稟離婚，原因屬「私人理由」不便透露，由於事發僅三星期，因此夫婦未討論一對仔女撫養權。豪門離婚好可能要分身家，有指部份陳復生夫婦聯名持有物業已被附註「暫緩註冊」即係「釘契」，可能影響買賣，熟手辦離婚人士指呢個係唔常見做法，至於點解咁做，真係一家唔知另一家事，佢哋閂埋門講乜，外人點知？

近一年甚少雙雙露面

其實近一年陳復生同何東舜銘已甚少雙雙露面，陳復生十．一應中國人民對外友好協會上京觀禮，只係大讚場面盛大，無談及老公；八方翻查資料，發現兩夫婦對上一次一齊現身公開場合，已經係上年7月中嘅事，當時兩人去金鐘港麗酒店，出席內蒙古呼倫貝爾兒童合唱團來港演出嘅記者會，因為呢個表演由何東舜銘國際文化基金會合辦，兩夫婦分別以基金會主席及副主席身份出席記者會致辭。
何東舜銘基金會過去幾年十分活躍，幾乎隔個月就有大型活動，但今年起韜光養晦，見報率驟跌；何東舜銘甚少蒲頭，陳復生多數單拖出動，冇乜講老公嘅事，一味講自己扶貧、有意復出幕前嘅大計。
傳出陳復生婚變消息同時，有指何東舜銘或夥拍澳門新一代「賭后」何超瓊，表兄妹聯手入主澳娛，由於兩人父母，即係賭王（何超瓊阿爸）同十姑娘（何東舜銘阿媽）勢成水火，知情人士話純屬揣測；不過小道消息則指表兄妹由細玩到大，上一代恩怨係以前嘅事，寃寃相報傷感情，話晒都係一家人，有乜好拗呢，而且何東舜銘生父何鴻章亦應該樂見何家大團圓，和氣生財吖嘛。

mailto:[email protected]