當年今日

馮仁昭四圍超:吳美珩麥包享特權八折買樓

蘋果日報 2002/01/25 00:00


為咗促銷將軍澳清水灣半島二期,新鴻基地產特別優待無綫旗下藝員可以用八折優惠價買樓盤。吳美珩噚日就由無綫經理人陪同之下,一齊去睇呢個新樓盤。
吳美珩一現身即受到新鴻基地產代理方面嘅熱情招待,佢哋一行幾人先參觀清水灣半島嘅會所設備,如桌球室、私人泳池、餐廳同私人影院。吳美珩話:「我最鍾意呢度會所間私人影院,設備好好。」

方便返電視城
吳美珩又去咗睇面積六百幾呎、未折扣售價約二百二十幾萬嘅樓盤示範單位,佢話好欣賞示範單位cyber感覺嘅布置,吳美珩又對樓盤附近嘅環境同交通問題好關心,佢話:「遲啲TVB搬去將軍澳,交通更加方便,買嚟自住或投資都幾好,不過我覺得九百幾呎嘅單位適合同實用啲。」
而麥包夫婦噚日都有去清水灣半島睇示範單位,麥包話:「我哋預算買八至九百呎嘅單位,預計三百萬,不過要計吓條數,睇吓供唔供得起。」

余錦基買百萬瑪莎拉蒂
瑪莎拉蒂最新型號Spyder,呢個星期六正式到香港,第一個訂呢架車嘅,就係公益金前主席余錦基,售價約一百萬元,呢個禮拜六,車行喺淺水灣酒店搞咗個交接儀式,重請咗靚女Rosemary到場,可謂落足本錢宣傳。

翁虹關心柏芝傷勢
翁虹去年因為脊骨受傷,休養咗大半年,所以佢對於張柏芝早前因表演飛車弄傷胸椎骨一事好關心,翁虹𠵱家喺內地拍戲,馮仁昭最近同佢通過電話,佢第一時間問馮仁昭柏芝嘅病情,當知道柏芝出咗院,翁虹都好開心,佢話雖然同柏芝唔熟,但覺得佢好爽朗、好堅強,所以柏芝入院嗰陣,佢都有送花籃慰問柏芝。
前Zen主音拍拖歎煲仔飯
近排天氣轉冷,天寒地凍就梗係最好去食煲仔飯啦。馮仁昭前幾日就喺九龍城嘅添樂園,撞到前Zen樂隊嘅主音黃和興,戴住頂冷帽,同一個少女一齊喺個卡位度撐枱腳食煲仔飯,兩個人重鬼死咁好傾,而阿興亦好有紳士風度,由佢埋單。

Sammi演技未被觀眾肯定
馮仁昭前晚喺屋企睇有線嘅《娛樂熱賣十點半》,當晚嘅討論話題係「劉青雲同鄭秀文(Sammi)攞咗電影評論學會嘅最佳男、女演員,究竟係咪實至名歸?」結果打電話嚟嘅觀眾,普遍都唔係好贊同Sammi憑《鍾無艷》攞最佳女演員,覺得佢喺《鍾》片嘅演出未算突出,同《瘦身男女》、《同居蜜友》分別唔大。講真,馮仁昭亦覺得喺《鍾無艷》入面,梅艷芳同張柏芝都做得比Sammi出色。

梁琤最怕百厭星
梁琤打女形象深入民心,不過見過佢真人嘅一定會覺得佢好斯文同溫柔,同螢幕上嘅硬朗形象好唔同。
梁琤同馮仁昭講,自己暫時都唔恨嫁,生BB就更加唔會,因為細佬妹都結咗婚,生咗細路,有時幫細妹湊仔,唔夠一個鐘,姨甥仔就搞到佢間屋七國咁亂,佢惟有即刻叫細妹湊番個仔返屋企,所以佢諗起生BB就怕怕喎。

黃卓玲晚飯搵着數
𠵱家香港經濟唔好,慳儉係一種美德,好似黃卓玲咁,就好識得精打細算,現時好多酒店嘅中西餐廳都推出咗啲會員優惠,例如兩個人食晚飯,其中一個就免費,佢同馮仁昭介紹呢啲優惠,重話自己成日同朋友食飯,年中可以慳番唔少,果然係醒目女一名。