美國攻打伊拉克進入第7日,雖然不時傳出伊拉克快將投降,但實際美軍仍面對伊軍頑抗,加上國際上反對美國動武的聲音亦愈來愈烈,美國若不能盡快擺平伊拉克,情況可能會變得更為複雜。港股轉趨觀望,好淡在9000水平爭持,最後下跌15點,收9047,成交金額49.12億元。外圍若有乜冬瓜豆腐,恒指隨時向下滑至8200方能企穩。
e莉莎話,有個客去東南亞度假返港之後,即刻落Order沽清國泰(293),近排個市成交咁靜,好難得有大Order,沽完貨當然問個客沽貨原因。大客話,搭機返港時發覺乘客唔多,1個人可坐3個位。落機時又有海關及工作人員戴着面具,同旅客玩「化妝派對」以示歡迎。乘搭龍運巴士回家時,上車即送一個「酸餿味道防毒SpaTreatment」,重要做足全程。因此佢認為,就算香港各界出盡法寶「吸引」旅客來港都冇用,旅遊業肯定出現不景氣,國泰難免受影響,最慘係唔知呢個「化妝派對」要玩到幾時。
華資基金支持瑩輝
國泰今劑可能重慘過911,股價噚日收報11元,跌1.35%,成交金額達1.28億元,其中沽空佔4067萬元。記憶所及,國泰於911時,股價曾跌至5.90元,真係諗落都驚。
瑩輝集團(1163)去年賺7686萬元,保持平穩,表現較市場預期略為差少少,不過股息3仙,都算有交代。黑客話,此股一向有本地華資基金支持,入貨成本唔算太貴,加上業績唔算太差,所以只有短暫沽壓,並未有進一步觸發洗倉潮,噚日重開始獲得支持反彈,升3.4%,收1.20元。據聞華資基金可能增持,至於係真係假,阿虎則唔敢肯定。
阿虎