出道以來從不會主動收徒弟，去年被雜誌及在節目環節安排之下，也變相多了幾位初出茅廬小友們，投資是學問也是藝術，亦考個人EQ，集思廣益有容乃大，唔需要跟邊個，反正投資無獨步單方。
小徒兒問到應該做分析員，還是直接走出來做股評人，可能小徒眼見坊間股評人無時無刻有一群Fans簇擁，覺得好威好風光，贏咗一兩隻股份就飄飄然。
出名有好多好處，可以多做生意，當然亦有機會被利用做人世界食大茶飯。出名只係Bonus，你越刻意求名，越標奇立異博出位，人家越懷疑你到底有幾多料，千萬不要本末倒置。
你出咗名，引來一批股市中的狂蜂浪蝶，對你嘅或然回報充滿非份之想，將你變成搖錢樹兼為佢賣命，值得嗎？

小徒兒要謹記，有機會可以加入具較大資本實力之大行，或者具銀行背景嘅機構學嘢見識見識，順便見識一下大場面，又可以試練一下自己實力，唔好井底蛙，千祈唔好未學行先學走，本地市場都未搞掂，就有樣學樣走出去，隨時損手爛腳焦頭爛額，盡量避免斬貨仲多過賺錢，因為除非個客係儍嘅，否則次次見你高買低沽斬倉蝕佢錢，遲早會離你而去。
與其無聊到每朝瞓醒起身，有如量度體溫般，去測量自己每天知名度升跌，不如睇多幾本年報，咁就唔會俾啲股票跣到攤攤腰。
有行家在上市公司周年晚宴鋤大弟，返大陸睇廠途中在直通車上爭分奪秒開牌局，後嚟又俾上市公司向公關投訴。人家上市公司老板一竹篙打死成船人，股評人被睇唔起是否活該，看在眼裏，同枱食飯各自修行，我算遲出道，亦唔方便兜口兜面叫人唔好賭，主席開到聲問罪覺唔覺醜？
事件令我諗起前年在另文中曾對曾淵滄教授有關地產股入賬方式看法有所質疑，曾教授仍然海量汪涵回應並謙稱自己不是會計專才之大方回應，從此令我對這位學者之寬宏氣度多了許多敬佩。
反觀市場中仍然有一些天天故步自封、顧影自憐、自怨自艾，呻到樹葉都落晒之輩，真是很大對比。
胡孟青