地產商賣樓，梗要捉客仔心理，所以近年推新盤，一講豪華二講風水，除咗過年過節，地產商間唔時都會搵風水師撐場。呢招華華印象中，四叔李兆基旗下恒地（012）用得較多，佢老友彤叔鄭裕彤旗下新世界（017）噚日亦用呢招，除咗搵名嘴陸叔陳永陸講投資，仲搵埋麥玲玲，教客睇風水揀樓。
據新世界公關話，佢哋賣樓好少搵風水師，呢次搞風水投資講座係頭一次。新世界代理執行董事何伍燕榆就話，最初見豬流感爆發，諗住元朗盤翹翠峰最啱用低密度同空氣好做賣點，後嚟有人提到不如加埋風水，所以最後出現咗麥玲玲加陸叔呢個新配搭。

有山有水係人都啱

新地（016）、長實（001）同九倉（004）都曾經搵風水師幫口推盤，四叔早幾年推港灣豪庭，亦搵風水師同銀行代表講風水同投資，恒地比華利山別墅亦請幾位風水師幫業主擇吉日入伙。
由發展商請返嚟嘅風水師，應該唔會倒米啩。麥師傅話今年生肖犯太歲嘅人，例如屬牛同屬羊嘅，都好啱買樓，因為結婚、添丁同置業都可以冲喜；做生意嘅人最好揀見水嘅景，咁見泳池梗得啦；要有利打工仔同細路讀書，揀山景最好。咁翹翠峰內園見泳池，向外見山，即係大包圍。至於陸叔亦話抗通脹投資商品最好，買樓當然亦好！

李華華
mailto:[email protected]