餐廳羅曾經與一位飲咗三十年嘅啤酒常客拗過乜牌子最好飲，人客堅持H牌與C牌最好，無此不歡。餐廳羅知道拗極都冇用，於是叫人將幾隻唔同牌子啤酒倒落唔同嘅玻璃杯，分abcde，拎去送畀啤酒常客飲，叫佢試吓分辨邊隻係H牌，邊隻係C牌，騎騎，常客搞錯晒，根本分唔出，問佢邊隻最好飲，佢只能答：「隻隻差唔多。」專家T話：「我喺英國學師之時，做過無數tasting（試飲），只有極端少數酒客知道唔同牌子嘅分別，只不過你一貼張牌子招紙上去，人人都話H牌好飲！」