張連偉識講日文（因做球僮時代，經常陪日本人打波），唔識英語，公子C去到美國，或者可以做張連偉嘅臨時繙譯，不過公子C乃係影相發燒友，最大心願就係在現場捕捉到啲大師嘅打波鏡頭，幫張連偉影番幾輯靚相，其他事情乃係次要。以公子C嘅教育水平、高爾夫球技術、影相功夫及經驗三方面加埋嚟講，全中國大概冇乜邊位仁兄仁姐好得過佢，左丁山自然希望佢一切順利，配合張連偉在美國表現得好好睇睇。
以左丁山之見，一個姚明令到NBA心花怒放，創造大量商機，如果張連偉在美國高爾夫球巡迴賽闖出名堂，做一個先行者，以中國之大，未來十年出番一個高爾夫球「姚明」，並非幻想，到時高爾夫嘅中國市場，你話會大成點呢！