草蜢今日到海洋公園參加「動夏嘉年華」揭幕禮，3子以動物主題服飾跳躍現身舞台，同一班火辣森巴舞蹈藝員一齊擺動，氣氛高漲。早前3人專誠為活動拍攝宣傳片段，蘇志威（阿細）被取笑同好多靚女合作，目不轉移。

草蜢入行6週年演唱會在海洋公園停車場舉行，蔡一傑回想1977年讀小學時首次踏足樂園，阿哥蔡一智就話：「去到海洋公園有3個必定任務，第一就係連玩幾轉坐纜車，同埋睇水族館，仲有睇黃昏日落，《黃昏都巿人》首歌都係咁樣寫出嚟。」蔡一傑亦補充話黃昏一定要玩過山車，好有衝出去感覺。

而阿細就稱：「以前都成日同女嚟玩，o依家都係，一坐纜車去到高位，我就會攬住對方好驚。」兩位兄弟踢爆佢驚老婆睇到，阿細話：「我冇嘢驚，冇畏高，從來冇話過驚老婆，呢啲係專重啫。」

3人希望再次重臨主題樂園搞演唱會，草蜢去年演唱會DVD正式推出，稍後會加緊宣傳，蔡一傑話：「喺其他2位成員去咗放假、湊女返學放學之際，就係我剪輯DVD嘅時候，花咗好多時間，原本隻碟應該新年就要推出，好多謝同我一齊剪片嘅剪接師，剪出嚟最緊要夠靚。」兩位兄弟就話佢咁辛苦係想剪接自己多啲部分，搞到蔡一傑詐晒型話：「係你哋唔幫手我先咁辛苦。」

精選娛聞，喺晒《娛果》
http://fb.com/appledailyent