公大校長梁智仁同老婆梁許安璞Annie平時鍾意請朋友返屋企食住家飯，做佢哋朋友就好啦，Annie出晒名入得廚房，去過四川、紐約學烹飪，又跟隨名師學藝，真係煮嘢食煮到曉飛，事關佢今年初起做咗國泰飛機餐美食顧問，設計咗30幾款菜式。
相信唔少人同八方一樣，一諗起飛機餐嘅味道已經唔多開胃，Annie都有同感，佢話以前搭飛機時，硬係覺得飛機餐唔係幾啱食。份餐唔好食，八方最多捱餓唔食，寧願個肚辛苦好過虐待自己味覺，Annie反而會去諗點樣可以令飛機餐好食啲，今次有機會做飛機餐顧問，佢𦧲飯應咁滯。
Annie噚日舉行試食會，煮咗四個頭盤，分別係豆瓣酥、紅燒烤麩、鮮味香菇同埋紅油雞絲粉皮；四個主菜則有上海獅子頭、百寶鴨、巴哈馬大蝦同埋東坡肉，餐牌有湯飲，係老火湯花膠煲螺肉，甜品則係焗西米布甸。呢個餐牌以上海菜為主，Annie話因為粵菜講究鑊氣，要即炒即食先和味，咁冇乜可能要空姐喺飛機上開爐拋鑊，加上粵菜較少冷盤，所以佢做飛機餐專攻上海菜，佢更講笑話上海人鍾意食隔夜餸，飛機餐全部一早煮好翻叮先食，喺飛機食上海菜最啱。

飛機常客都係四海為家大忙人，對真正「住家菜」有迷戀，Annie話煮飛機餐最高境界係煮出「家的味道」，所以佢堅持唔用味精。由於人嘅味蕾上到高空就無咁敏感，所以飛機餐要比平時煮得更濃味，為咗煮出真正「住家菜」味道，佢個個禮拜都會同國泰班大廚一齊試食。講到底，大家想食「住家菜」都係因為思鄉，Annie話佢都有引入香港最地道嘅茶餐廳食物，包括豉油西餐代表作焗豬扒飯。
除咗味道，Annie話煮飛機餐最大挑戰係要好亁淨，佢坦言平時煮飯搞到廚房烏煙瘴氣，煮飛機餐就要百分之一百五十咁衞生先得。Annie設計嘅菜式8月起喺大部份國泰離港航班提供，不過只限頭等同商務客先有得食，坐經濟位嘅乘客唔想虐待自己嘅話，一係買外賣上機，一係就絕食喇。