韓國人氣育兒節目《超人回來了》今日播出最新一集，國腳李同國就帶住人氣王大發BB及家姐雪雅、秀雅去到水族館，李同國為咗鼓勵越大越細膽嘅大發BB要有勇氣，以身作則去體驗潛水睇鯊魚。

水族館方面嘅負責人表示入面雖然有攻擊性低嘅幼鯊，但都有兩條成人鯊魚，搞到原本已經覺得驚嘅李同國更加驚，喺去換衫嘅途中就打畀老婆，希望得到老婆安慰。當老竇喺水中體驗時，大發BB三姊弟就喺外面睇住，一開始仲好大聲同老竇講加油，不過當鯊魚接近老竇時，愛父心切嘅三人就大嗌「老竇唔好死」，雖然李同國聽唔到，但令觀眾大感窩心。

及後李同國見安全冇事發生，就開玩笑扮浸親，立即嚇到三姊弟爆喊，認真大細路。不過其實呢一切都只係李同國為三姊弟準備嘅驚喜，李同國隨即拎出寫住「雪雅、秀雅、大發，以後更加勇敢地長大」嘅橫額，唔知三姊弟明唔明老竇嘅心意呢？