去年5月，王浩信仲忙緊拍台慶劇《溏心風暴3》，當時有報道話佢打算買樓氹老婆陳自瑤，目標瞄準豪宅地段淺水灣。當時王浩信回應話距離目標尚有距離。一年之後，王浩信已升為視帝，仲好開心咁同大家講，會代囡囡送禮物俾太太，就係獨立屋！

上月24日，終於傳來新消息，就係王浩信首置成功，以3306.6萬，購入清水灣傲瀧11座高層B單位，實用面積1,837呎，呎價1.8萬元。但呢個單位，冇太太份，而係送俾媽媽。當時王浩信接受傳媒訪問時表示，「我同YoYo商量過，o依家先買俾媽咪；之後繼續努力做嘢搵錢，先再送俾老婆，佢都好贊成呢個決定。」有傳今次兩人婚變，就係因為王浩信買樓，瞞住陳自瑤。亦有傳王浩信特登唔寫老婆名，等離婚嘅時候可以唔使對方分身家。

今日陳自瑤現身活動時，鄭重澄清：「絕對冇，我係知道，我想話俾大家知，作為子女，送禮物俾父母係應該嘅事，點解大家要咁樣大造文章？佢（王浩信）係應承我，但係未必係o依家。」

「我好多謝佢送咁厚禮俾我，我係好開心，相信佢應承咗我嘢，係一定會做，只不過今次係作為仔女，首先要孝順咗父母先喇，係咪？我覺得好應該，好正常嘅事。」

至於有指陳自瑤搵李居明指點迷津，佢就話只係做一個風水節目，「都係會講事業、家庭婚姻嘅嘢，基本上乜嘢人都會問，好正常，唔係嘢大件事。」但李居明稱返港後陳自瑤都有繼續請教，陳自瑤稱：「我唔知當中係咪有乜嘢誤會，我返嚟香港冇搵過師傅，你知師傅都好忙，可能係有誤會，當中有啲出錯。」