寒風中嘅娥班子，今日有個朝十晚四嘅活動，就係齊集禮賓府，一齊腦震盪。有別於上兩次Brainstorm，今次除咗局長同副局，仲有埋政治助理，除咗外訪中嘅商經局局長邱騰華等，40幾人齊齊整整首度碰頭。

話明係Brainstorm，一如所料互相交流冇乜決定，據知特首林鄭月娥席門闡述施政報告嘅理念，包括理財新哲學，似乎希望統一團隊嘅思想，同時亦講明日後要同立法會保持良好關係，叫大家畀下意見，又話要爭取明年立法會休會前通過一地兩檢方案。財爺陳茂波亦孭重飛，就係向大家講解預算案係點制定，幫新丁政治助理長下知識。

新聞處長黃智祖都有登場，負責講下現時香港嘅傳媒運作，例如紙媒同網媒發展、如果政府要做宣傳又要點。席間仲有一位「特別嘉賓」，就係負責改組中策組嘅羅志康，解構新嘅「政策創新與統籌辦事處」做啲乜東東。

相信唔少人都好關心，今次腦震盪仲有冇齋滷味？答案係...無嘅，只有有普通炒粉麵飯等醫肚囉。