韓片《逆權司機》係根據真人真事改編，故事結局眾所周知，湯瑪士基斯曼飾演嘅德國記者原型係Jürgen Hinzpeter，佢記錄一幕又一幕殘忍畫面，成為光州事件唯一嘅紀錄片，並推出著作《藍色眼睛的目擊者》。Jürgen Hinzpeter於去年逝世，佢離世前一直致力尋找接載自己離開光州嘅無名英雄的士司機「金四福」（片中宋康昊給德國記者嘅假名），但最後都遍尋不獲，到近日金士福的兒子受訪，提供照片力證父親就是當年的司機，可惜是父親早於1984年因肝癌去世，未能與Jürgen Hinzpeter相認。

自從《逆權司機》喺韓國贏盡口碑同票房後，事件令政府重新調查光州事件外，亦對片中司機嘅原型身份大感好奇。當中喺片中飾演的士司機「金萬燮」嘅宋康昊，喺片中最後畀咗假名「金四福」給德國記者，令到德國記者到結尾到搵唔到宋康昊。而電影開畫後，韓國傳媒就報道有一名自稱係的士司機嘅兒子「金承必」喺網上留言，指電影有啲細節與現實不符。

金承必話佢爸爸原名係金士福，片中指的士司機嘅妻子早逝，以及獨養一女係錯誤，起初佢嘅言論就惹來各方批評，不過及後佢提供照片力證，最終電影司都證實咗佢身份。金承必指父親年並非的士司機，而係酒店嘅司機，因為能操英文及日文，所以會經常接載外國人。

金承必話記得當晚(即金士福接載德國記者到光州)父親好夜先返屋企，又聽到父親講咗句：「怎麼可以這樣殺害自己國家的人」，而父親因親睹慘痛經歷，似乎大受打擊，更經常飲酒，最後罹患肝癌喺1984年12月19日離世。