協助基層兒童圓音樂夢的龐倩渝，人稱胡太，是音樂兒童基金會創辦人之一。個子小小的她鋼琴造詣高超，曾在九龍塘一家名校擔任音樂總監，6年前毅然辭職創辦音樂兒童基金會，為的是將音樂帶入劏房，讓基層兒童也有機會學習音樂。

記者：金敏琍、謝頌昕

宏大理想來自身同感受的經歷，胡太自小在寮屋區長大，而且有嚴重口吃，由小時候的一個玩具琴開始愛上琴音。父母擺街邊賣煎釀三寶養活一家五口，終於捱到上公屋，家中有空位可放鋼琴，父親仍然想盡辦法，希望三個女能接觸音樂，「有鄰居嘅親戚喺美孚新邨教琴，咁就帶咗我哋過去。我仲記得爸爸當日叫我着裙，去美孚新邨係要着裙，嗰陣時係豪宅，咁我哋就着咗條裙，3個女好乖咁上去。呢個老師知道我哋環境好差，佢話我可以教你哋3個女學琴」。這位有心人知道鋼琴造詣要勤練習，更慷慨贈二手琴：「佢話有個琴冇咗兩個琴鍵，有兩個窿喺度，準備要丟棄。」於是龐爸爸借來貨車，找來朋友協助把鋼琴吊上公屋寓所，從此琴音在龐家響起。

一次機緣遇上有心人義教鋼琴，胡太的生命從此改寫，長大後更在演藝學院音樂學院畢業：「我好好彩，學咗3年度就有人請我去教琴，咁我第一次教琴賺到嘅錢就可以交學費。」不必再向父母要錢。

現時胡太對答如流，難以想像從前是個嚴重口吃的女孩，鋼琴不單助她帶來事業，更建立自信得以克服自身困難，令她深深體會音樂對小朋友成長時期會帶來關鍵作用，長大後她與當藝人的姊姊龐秋雁創辦音樂兒童基金會，為基層兒童爭取免費學習音樂的機會。她指最初確有很多人報名：「免費喎，有着數喎，報名嘅人真係好多……亦有人發現原來要攞住個樂器咁重，又要去表演、又要練，真係有人放棄，亦有人唔珍惜。」

不過亦有基層小朋友知道機會難得，更珍惜免費學音樂的機會：「佢哋真係冇機會、冇可能學音樂，學音樂應該完全不在佢list內，雖然我哋唔收錢，但要畀家長知學音樂唔係幾個月嘅事，而係幾年嘅事。」她坦言，每次都要向家長解釋，音樂要持之以恆，才有成果。

2013年基金會初創時只有15名導師，現已增至約80人。胡太除繼續找資助，她亦衷心希望學有所成的學員可以充當小老師義教，將他們的理念傳承下去：「2013年嘅學生，已經達到某一程度，好叻啦。最大希望係佢哋能夠返嚟做小導師，幫其他初學嘅細路仔。」

本身是兩子之母的胡太，深明小朋友潛力無限，能否讓潛能發揮全仗家長決定：「希望家長明白學習嘅路非常長，除在意小朋友嘅成績，我想家長望一望小朋友最鍾意係咩嘢，會唔會考慮去成就佢呢樣嘢。」她慨嘆，時下家長只着重「攞咩獎、幾多分」，擔心如果忽視了孩子的天份和興趣：「佢哋最叻嗰樣嘢，嗰個光、嗰個火慢慢就會熄滅。」

小朋友透過音樂發掘潛能，音樂兒童基金會每年都安排學員上台表演，既讓家長們見證子女轉變及成長，亦讓學員在台上建立自信：「家長會發現『嘩，點解個仔喺台上咁醒！』細路仔覺得自己得，有信心就會覺得有希望，有希望就可以圓佢嘅夢想。」

展望未來，她希望更專注為2至12歲小朋友提供服務，因她深信這個階段是小朋友學習的黃金時期，希望更多低下階層小朋友都有機會接觸音樂。

人們說求學不是求分數，至於音樂呢？她指，小朋友音樂夢，重點其實不是音樂，她認為音樂只是一個途徑，一個媒介，她希望小朋友透過學習音樂，明白凡事都有解決方法，因為由一粒音符開始，即使最初困難重重，但若能堅持不放棄，最終便能彈奏整篇樂章，從而學懂感受世間的美好，將來亦能承傳幫助其他有需要小朋友，「當你完成整個樂章時，你再同其他小朋友合奏嗰種力量係你估計唔到，當你學咗呢樣嘢再珍惜你曾經擁有嘅嘢，我希望你可以帶返畀個社會，帶返快樂去畀其他人，佢唔一定用音樂帶畀其他小朋友，但佢可以用佢學嘅嘢，帶返畀其他小朋友或家庭。」

--------------------------
你撐蘋果 我捐$1
支援反送中抗爭者
--------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568